Jednanski porjad
Zwjazkoweho předsydstwa Domowiny
§ 1
Powšitkowne zasady dźěławosće
1. Zwjazkowe předsydstwo Domowiny nawjeduje dźěło třěšneho zwjazka mjez hłownymi zhromadźiznami.
2. Zestawa, nadawki a kompetency zwjazkoweho předsydstwa rjaduja artikl 9, wotrězki 1 - 8 wustawkow Domowiny.
3. Zwjazkowe předsydstwo spjelnja swoje nadawki z
- rjadnymi a wurjadnymi posedźenjemi,
- přihotowanskim a rozsudźacym dźěłom prezidija, dalokož to tutón porjad předwidźi,
- analytiskim a koncepcionelnym předdźěłom dźěłowych wuběrkow a skupinow,
- koordinaciju a integraciju cyłonarodneho dźěła we wothłosowanju z předsydstwami sobustawskich župow a towarstwow a z druhimi zwjazkarjemi,
- skutkowanjom kóždeho jednotliweho čłona zwjazkoweho předsydstwa w swojim towarstwje a w zjawnosći,
- aktiwnym zjawnostnym dźěłom wo zaměrach třěšneho zwjazka a wo połoženju a zajimach serbskeho ludu.
4. Zwjazkowe předsydstwo schadźuje so po artiklu 9, dypk 7 wustawkow Domowiny znajmjeńša štyri króć wob lěto. Nimo toho zwoła so kóžde lěto klawsurne posedźenje. K tomu so lětny plan dźěławosće nastaji, kotryž nimo terminow tež městnosć a wobsahowe ćežišća posedźenjow postaji.
§ 2
Posedźenja zwjazkoweho předsydstwa
1. Wuradźowanja zwjazkoweho předsydstwa su po artiklu 9, dypk 8 wustawkow Domowiny zjawne. Nowinska rěčnica Domowiny informuje medije tydźeń do toho wo posedźenjach a wozjewi zdobom termin a ćežišća posedźenjow na internetnych stronach Domowiny.
2. Kóžde wuradźowanje dźěli so po potrjebje do zjawneho a njezjawneho dźěla. Personalne prašenja maja so w kóždym padźe w njezjawnym dźělu wuradźowanja a w njepřitomnosći potrjecheneho wobjednać.
Zjawny a njezjawny dźěl posedźenja matej so w namjeće za dnjowy porjad wupokazać.
Nimo toho smě kóždy čłon zwjazkoweho předsydstwa do schwalenja dnjoweho porjada próstwu wo wuzamknjenje zjawnosće při wobjednanju wěstoho dypka dnjoweho porjada stajić. Wo próstwje rozsudźi so w njezjawnym wuradźowanju. Čłonojo zwjazkoweho předsydstwa su winowaći, wo wšitkich w njezjawnym dźělu posedźenja wobjednanych naležnosćach mjelčeć.
3. Rjadne posedźenja zwjazkoweho předsydstwa zwoła předsyda Domowiny na zakładźe schwaleneho lětneho plana dźěławosće.
Wurjadne posedźenje zwoła so wot předsydy po pisomnym žadanju znajmjeńša štwórćiny čłonow zwjazkoweho předsydstwa, třoch towarstwow abo prezidija (hlej wustawki Domowiny artikl 9, dypk 7). Wone ma so w běhu dweju tydźenjow přewjesć.
4. Přeprošenje z namjetom za dnjowy porjad a předłohami ma kóždy rjadny čłon zwjazkoweho předsydstwa najpozdźišo 10 dnjow do wuradźowanja dóstać.
Jeli sej to adresat přeje, móža so jemu podłožki tež z mejlku připósłać.
Wo naležnosćach, kiž njejsu w připósłanym namjeće za dnjowy porjad zapisane, smě so jenož potom wuradźować a rozsudźić, hdyž njeda so naležnosć přestorčić a zwjazkowe předsydstwo wobjednanju přihłosuje.
Přeprošenja z předłohami dóstawaja tež jednaćel a zastupowacy jednaćel, nawodnica Rěčneho centruma WITAJ, jeje zastupjer a referenća zarjada Domowiny.
Podłožki smědźa tež dóstać předsydaj rewizijneho a změrcowskeho wuběrka, hdyž wo to proša. Samsne płaći za županow a předsydow sobustawskich towarstwow, kiž njejsu z čłonom zwjazkoweho předsydstwa.
§ 3
Nawjedowanje posedźenjow
1. Posedźenja nawjeduje předsyda, w padźe jeho zadźěwanja městopředsydaj.
2. Předsyda a městopředsydaj tworja posedźenski prezidij. Nawoda posedźenja konsultuje so we wažnych prašenjach nawjedowanja posedźenja a dodźerženja wustawkow Domowiny kaž tež jednanskeho porjada zwjazkoweho předsydstwa z dalšimaj čłonomaj posedźenskeho prezidija. Wonaj měłoj nawodźe posedźenja ze swójskeho wida na předpisane postupowanje skedźbnić, je-li trěbne. Hewak jeho při nawjedowanju posedźenja podpěrujetaj.
3. Nawoda posedźenja ma slědowace nadawki:
- posedźenje wotewrěć a přitomnych powitać,
- přitomnosć a zamołwjenja zwěsćić,
- wobzamknjenjakmanosć zwěsćić,
- zajatosć zwěsćić,
- wo dnjowym porjedźe wothłosować dać,
- diskusiju k jednotliwym dypkam nawjedować a z wobsahowym rezimejom zakónčić,
- konkretny tekst wobzamknjenja do wothłosowanja předčitać resp. posłowny namjet za wobzamknjenje sformulować abo přeformulować,
- wo předłohach a druhich namjetach k wobzamknjenju wothłosować dać,
- rezultat wothłosowanja zwěsćić (tři kategorije: za namjet / přećiwo namjetej / so hłosa wzda).
- přiwzaće abo wotpokazanje namjeta zwěsćić,
- wo wjacorych čitanjach wěstych předłohow rozsudźić dać,
- wo wotsadźenju dypkow dnjoweho porjada resp. wo wróćodaću předłohow k dalšemu wobdźěłanju w prezidiju abo dźěłowych wuběrkach rozsudźić dać,
- porjadny wotběh posedźenja na zakładźe jednanskeho porjada zawěšćić a domowe prawo wukonjeć,
- wo wobsahach k wozjewjenju w medijach rozsudźić dać a
- posedźenje zakónčić.
§ 4
Wobdźělenje na posedźenjach
1. Čłonojo zwjazkoweho předsydstwa su winowaći, so na posedźenjach wobdźělić. W padźe zadźěwanja chorosće abo druhich wažnych přičin dla su winowaći, předsydu abo sekretariat zarjada Domowiny z podaćom přičiny wo tym informować.
2. Lisćina za wupłaćenje posedźenskich pjenjez płaći zdobom jako lisćina přitomnosće. Kóždy čłon zwjazkoweho předsydstwa zapisa so ze swojim podpismom do wuležaceje lisćiny přitomnosće a wupjelni lisćinu za zarunanje jězbnych wudawkow, jeli spjelni k tomu trěbne wuměnjenja po płaćacym rjadowanju.
3. Čłon zwjazkoweho předsydstwa, kotryž chce posedźenje dočasnje wopušćić, ma to nawodźe posedźenja z podaćom přičiny zdźělić.
4. Po wustawkach Domowiny (artikl 9, dypk 3) mataj so jednaćel a zastupowacy jednaćel na posedźenjach zwjazkoweho předsydstwa z poradźowacym hłosom wobdźěleć. Samsne přitrjechi za nawodnicu RCW a jeje zastupjerja, tematizuja-li so kubłansko-politiske prašenja. Nowinska rěčnica a referent za nutřkowne naležnosće so nowinskeho wozjewjenja a poradźowanja posedźenskeho prezidija dla tež na wšitkich posedźenjach wobdźěletaj.
5. Předsyda rewizijneho wuběrka kaž tež předsyda změrcowskeho wuběrka mataj po artiklu 9, dypk 3 wustawkow Domowiny prawo, so na wuradźowanjach zwjazkoweho předsydstwa z poradźowacym hłosom wobdźěleć.
6. Zastupjer Domowiny we FUEN-prezidiju ma prawo, so z poradźowacym hłosom na posedźenjach zwjazkoweho předsydstwa wobdźěleć.
7. K zjawnym posedźenjam ma kóždy zajimc přistup. Zajimcy pak nimaja prawo, do jednanjow zapřimnyć abo wotběh posedźenja mylić.
8. W njezjawnym dźělu wobdźěla so čłonojo zwjazkoweho předsydstwa, jednaćel a zastupowacy jednaćel kaž tež protokolant ze zarjada. Natočenje so hasnje. Pisa so wuslědkowy protokol. Jeli sej maćizna předwidźaneho dypka to žada, smědźa so dalše wosoby na njezjawny dźěl přeprosyć.
§ 5 Wobdźělenje na diskusiji
1. Čłonojo zwjazkoweho předsydstwa a prezidija, jednaćel a zastupowacy jednaćel, kaž tež přeprošeni hosćo maja prawo, so słowa jimać, hdyž jim nawoda posedźenja słowo přepoda. Kóždy diskutant smě so jenož dwójce k samsnej naležnosći wuprajić.
Słowo so po rjedźe přizjewjenjow přepodawa.
Wo rěčenskim prawje njeprošenych hosći rozsudźi posedźenski prezidij.
2. Čłon zwjazkoweho předsydstwa, kiž chce k jednanskemu porjadej porěčeć, přizjewi to ze zběhnjenjom wobeju rukow. Wón dóstanje potom hnydom słowo.
Hdyž wuprajitej so žadanje abo namjet k wothłosowanju, smětej zasadnje jedyn čłon zwjazkoweho předsydstwa za to a jedyn přećiwo tomu rěčeć. Potom so wothłosuje.
3. Rěčny čas móže so wot posedźenskeho prezidija po potrěbnosći wobmjezować.
Hdyž so hižo k wěcy njerěči, ma nawoda posedźenja prawo, rěčnikej słowo sćazać.
4. Jednanski porjad dowola čłonam zwjazkoweho předsydstwa w běhu posedźenja sćěhowace namjety:
- wróćenje naležnosće do prezidija, do dźěłoweje skupiny resp. do dźěłoweho wuběrka abo na Domowinski zarjad, zo by so předłoha k tomu přihotowała resp. předležaca předłoha so předźěłała
- wotsadźenje naležnosće z dnjoweho porjada resp. přestorčenje wobjednanja
- zakónčenje diskusije k naležnosći
- wothłosowanje wo předłoze resp. wo namjeće k wobzamknjenju
- přetorhnjenje abo zakónčenje posedźenja
- wuzamknjenje zjawnosće
- žadanje za tajnym wothłosowanjom abo za wothłosowanjom po mjenje
- naprašowanje wěcywustojnych wosobow
- přepodaće połnomocy k doskónčnemu rozsudej prezidijej, předsydźe abo Domowinskemu zarjadej.
5. Čłon zwjazkoweho předsydstwa, kotryž je so k diskusiji přizjewił a njeje zakónčeneje diskusije dla wjace słowo dóstał, smě swój přinošk pisomnje předsydźe zapodać. Přinošk so protokolej připołoži.
6. Do wothłosowanja wo předłohach a namjetach za wobzamknjenje smě kóždy čłon zwjazkoweho předsydstwa wosobinske wujasnjenje wotedać. K tomu přepoda jemu nawoda posedźenja po wotpowědnym přizjewjenju słowo.
Tajke wosobinske wujasnjenje smě jenož runostajenje wopačnych wuprajenjow abo wotwobaranje wosobinskeho nadpada wobsahować.
§ 6
Wothłosowanja a wobzamknjenja
1. Po artiklu 6, dypk 3 wustawkow Domowiny je zwjazkowe předsydstwo kmane k wobzamknjenju, hdyž je wjace hač połojca jeho čłonow přitomna.
Namjet je přiwzaty, hdyž je wjetšina přitomnych hłosakmanych za namjet hłosowała, dalokož njeje to w tutym porjedźe abo we wustawkach hinak postajene. Při samsnej ličbje hłosow za abo přećiwo namjetejje namjet wotpokazany.
K wothłosowanju dóstanje kóždy čłon hłosowanske kartki (zelenu kartku z napismom “za namjet/za naraźenje”, čerwjenu kartku z napismom “přećiwo namjetej/pśeśiwo naraźenju” a běłu kartku z napismom “so hłosa wzdam/so głosa wzdam”).
2. Namjet k wobzamknjenju dyrbi pisomnje abo ertnje jasnje sformulowany być, prjedy hač so wo nim wothłosuje.
Wo kóždym namjeće so jednotliwje wothłosuje.
Hdyž předleža wjacore namjety k wobzamknjenju nastupajo samsnu naležnosć, potom wothłosuje so najprjedy namjet, kiž po wobsahu najbóle wotpowěduje zaměrej wobzamknjenja.
Signalizuje-li jedne sobustawske towarstwo z pisomnym wopodstatnjenjom w předpolu posedźenja k namjetej za wobzamknjenje sylne wobmyslenja, ma so předsydstwo tutoho towarstwa do wothłosowanja słyšeć. Słyšenje předsydstwa tutoho towarstwa so přewjedźe w zwjazkowym předsydstwje.
3. Wothłosuje so zasadnje zjawnje ze zběhnjenjom hłosowanskeje kartki.
Hdyž sebi to jedyn čłon zwjazkoweho předsydstwa žada, potom so po mjenje abo tajnje wothłosuje.
Předležitej wobaj namjetaj, potom so tajnje wothłosuje.
Při wothłosowanju po mjenje předčita nawoda posedźenja mjena wotpowědneho čłona zwjazkoweho předsydstwa, kiž dyrbi potom wuprajić, hač wón "za namjet" abo “přećiwo namjetej” hłosuje resp. so hłosa wzda. To so we wotpowědnej lisćinje dokumentuje a protokolej přida.
Čłonojo zwjazkoweho předsydstwa, kiž njejsu wobzamknjenju přihłosowali, smědźa sej žadać, zo so to w protokolu naspomni.
4. Hdyž so wuměnjenja za płaćace wobzamknjenja zasadnje změnja, móže so wotpowědne prašenje znowa w zwjazkowym předsydstwje wobjednać. Při tym ma so wo tym rozsudźić, hač so dotalne wobzamknjenje zběhnje.
5. Wólby a personalne rozsudy přewjedu so w tajnym wothłosowanju. Smě so zjawnje wolić, hdyž njeje žadyn čłon zwjazkoweho předsydstwa přećiwo tomu.
Wolena je zasadnje wosoba, kotraž dóstanje wjace hač połojcu hłosow wšitkich čłonow zwjazkoweho předsydstwa.
Při wjacorych mjenach na jednym wólbnym lisćiku, su ći wuzwoleni, kotřiž su po rjedźe najwjac hłosow dóstali. Při runosći hłosow ma so wuša wólba přewjesć. Woleny je potom tón, kiž docpěje we wušej wólbje wjetšinu hłosow.
6. Čłonojo zwjazkoweho předsydstwa njesmědźa so na wobjednanju a schwalenju naležnosćow wobdźělić, hdyž móže wobzamknjenje jim wosobinsce, jich swójbnym resp. přiwuznym prěnjeho stopjenka abo institucijam, kiž woni juristisce zastupuja, bjezposrědne lěpšiny abo njelěpšiny přinjesć.
Potrjecheny čłon zwjazkoweho předsydstwa dyrbi sam swoju zajatosć do wobjednanja wotpowědneje naležnosće přizjewić. Wón smě so w padźe zjawneho dźěla posedźenja k hosćom sydnyć, w padźe njezjawneho dźěla pak dyrbi posedźensku rumnosć wopušćić.
Hdyž wobsteja dwěle na zajatosći resp. njezajatosći, potom rozsudźi so w njepřitomnosći potrjecheneho.
§ 7
Protokolowanje
A. Protokol zjawneho dźěla
1. Wo kóždym zjawnym posedźenju zdźěła so protokol wobzamknjenjow. Wo njezjawnym dźělu posedźenja zhotowi so separatny wuslědkowy protokol.
Jako pomocny srědk za protokolowanje zjawneho dźěla posedźenja wužiwa so natočenje.
2. Protokol zjawneho dźěla ma wobsahować:
* termin, městnosć, započatk a kónc wuradźowanja
* mjeno nawody/nawodow zeńdźenja
* přitomnosć čłonow a hosći
* dnjowy porjad
* čisła a titule wobjednanych předłohow
* wobzamknjenja z formulaciju namjeta, z wuslědkom wobhłosowanja a
z běžnym čisłom tuteje wólbneje doby
* nadawki, kiž su so druhim gremijam přepodali
* wosobinske stejišćo, hdyž sej to čłon zwjazkoweho předsydstwa žada
* teksty rozprawow k bytostnym naležnosćam jako přidawk k protokolej
3. Čłonojo zwjazkoweho předsydstwa a jeho stajni hosćo dóstanu w běhu jednoho tydźenja po posedźenju naćisk protokola, kotrež so na přichodnym posedźenju schwali.
4. Županojo a předsydźa sobustawskich towarstwow dóstanu protokol k informaciji, hdyž njejsu z čłonom zwjazkoweho předsydstwa a wo to proša.
5. Protokol so na přichodnym zjawnym wuradźowanju zwjazkoweho předsydstwa schwali a spjelnjenje wobzamknjenjow kontroluje.
B. Protokol njezjawneho dźěla
1. Wo kóždym njezjawnym posedźenju zdźěła so wuslědkowy protokol.
2. Protokol njezjawneho dźěla abo dźěle protokola smědźa so tež jako wobzamknjenski abo posłowny protokol wjesć, dalokož tutomu wjetšina přitomnych přihłosuje.
3. Protokol njezjawneho wuradźowanja so we wosebitym tresorje Domowiny zawrjeny składuje a to jónu jako digitalny dokument na datowym nošaku a jónu jako ćišćany dokument. Přistup k tresorej je jenož předsydźe, městopředsydomaj a woprawnjenym wosobam móžny. Woprawnjene wosoby rjaduja so w dźěłowym porjedźe zarjada Domowiny.
4. Sobustawam zwjazkoweho předsydstwa a změrcowskeho wuběrka ma so na žadanje protokol pod dohladom w zarjedźe přistupnić.
5. Protokol njezjawneho dźěla schwali so na přichodnym njezjawnym zeńdźenju zwjazkoweho předsydstwa. K tomu so dokument jako ćišćana wersija přitomnym wudźěli, so z mjenom přijimowarja woznamjeni, so čita, wobjedna, schwali a so zaso hromadźi. Hač na w dypku B-3 mjenowany eksemplar so wšě druhe zniča.
§ 8
Předłohi
1. Předłohi do zwjazkoweho předsydstwa smědźa zapodać: prezidij, předsyda a městopředsydaj Domowiny, čłonojo zwjazkoweho předsydstwa, dźěłowe wuběrki resp. skupiny kaž tež rewizijny a změrcowski wuběrk Domowiny a předsydstwa sobustawskich župow a towarstwow.
Předłohi do prezidija smě tež zarjad Domowiny zapodać.
Předłohi zdźěłaja so, hdyž so trěbnosć wobjednanja wotpowědneho prašenja ze stron wolenych gremijow třěšneho zwjazka, předsydstwow sobustawskich župow a towarstwow kaž tež zarjada Domowiny zwěsći, hdyž zwjazkowe předsydstwo wotpowědny nadawk wobzamknje abo posedźenski plan zwjazkoweho předsydstwa to předwidźi.
2. Předłohi měli so zasadnje prezidijej k předwobjednanju přepodać, zo by móhł zwjazkowemu předsydstwu doporučenje k doskónčnemu wobjednanju předłohi přepodać. To rěka, zo dyrbja 4 tydźenja do předwidźaneho wuradźowanja zwjazkoweho předsydstwa w zarjedźe Domowiny předležeć.
Zarjadniska zamołwitosć za rjadowanje předłohow leži pola referenta za nutřkowne naležnosće.
3. Za přihotowanje předłohow ma so wosebity formular wužiwać (hlej přiłoha).
Kóžda předłoha dóstanje swoje čisło (běžne čisło + lětoličba).
Předłohi, kiž so w prezidiju na zakładźe paragrafa 10 tutoho jednanskeho porjada dorozsudźa, dóstanu před běžnym čisłom přidawk “P”.
Předłohi, kiž dyrbja so w zwjazkowym předsydstwje doskónčnje wobjednać a schwalić, dóstanu přidawk “ZP”.
Wobě družinje předłohow so separatnje ličitej a składujetej.
Wopodstatnjenje za namjet k wobzamknjenju přida so we wotpowědnej přiłoze.
Při předłohach, kiž słuža jenož k informaciji , zapisa so do rubriki “Namjet za wobzamknjenje” pasus, zo so informacija na wědomje bjerje.
4. Hdyž so w běhu jednanjow zwjazkoweho předsydstwa wotchilacy namjet k wobzamknjenju sformuluje, potom zapisa so nowa formulacija do přehlada předłohow.
§ 9
Wutworjenje dźěłowych wuběrkow
1. Zwjazkowe předsydstwo abo prezidij wutworitej po potrjebje k analytiskemu a koncepcionelnemu wobdźěłanju wěstych naležnosćow dźěłowe wuběrki. Kóždy wuběrk měł z 10 čłonami wobstać, wjetšina z nich měła być z čłonom zwjazkoweho předsydstwa.
Postaja so zestawa a nawoda dźěłoweho wuběrka, jeho naměstnik, po wobsahu přisłušny zamołwity zarjada, wobsahowe zaměry dźěławosće a doba skutkowanja.
Wuběrki maja prawo, stajić próstwu wo juristisku poradu na prezidij.
2. Za wotběh posedźenjow dźěłowych wuběrkow płaća w zasadźe postajenja jednanskeho porjada zwjazkoweho předsydstwa wotpowědnje. Wuradźowanja wuběrkow su zasadnje njezjawne. Wuwzaća su móžne.
Čłonam zwjazkoweho předsydstwa a prezidija je přistup w kóždym času móžny.
3. Protokole wuradźowanjow dźěłowych wuběrkow dóstanu nimo wuběrkownikow tež čłonojo prezidija. Čłonojo zwjazkoweho předsydstwa smědźa sebi protokole požadać.
4. Jako čłonojo dźěłowych wuběrkow móža so nimo čłonow zwjazkoweho předsydstwa a prezidija dalši zastupjerjo župow a towarstwow kaž tež fachowcy powołać. Woni podleža samsnemu rjadowanju dowěrliwosće kaž čłonojo zwjazkoweho předsydstwa.
5. Wuběrki rozprawjeja zwjazkowemu předsydstwu abo prezidijej prawidłownje wo rezultatach a dźěławosći swojeho skutkowanja a
předpołoža wotpowědne namjety jako předłohi k wobjednanju a schwalenju.
§ 10
Prezidij
1. Po artiklu 10 wustawkow Domowiny słušeja do prezidija předsyda Domowiny, jeho městopředsydaj a dalšej čłonaj zwjazkoweho předsydstwa, kotrejuž na namjet předsydy zwjazkowe předsydstwo powoła.
2. Po artiklu 10 dypkaj 3 a 4 wustawkow Domowiny postaji zwjazkowe předsydstwo
slědowace zamołwitosće prezidija:
1. přihotować wobsahowje posedźenja zwjazkoweho předsydstwa,
2. poradźować zwjazkowe předsydstwo we wobsahowych a wažnych organizatoriskich prašenjach a k tomu předpołožić trěbne předłohi,
3. poradźować předsydu Domowiny w jeho běžnej dźěławosći,
4. wutworić w nadawku zwjazkoweho předsydstwa nachwilne dźěłowe skupiny resp. wuběrki a jich dźěło koordinować.
5. koordinować běžnje dźěławosć institucionelnych wobłukow Domowiny a přijimać k tomu trěbne informacije,
6. přihotować hłowne zhromadźizny Domowiny a nawjedować wudźěłanje
rozprawy wo dźěławosći zwjazkoweho předsydstwa a k aktualnemu połoženju serbskeho ludu.
7. rozsudźić wo slědowacych prašenjach
a) chwatnje trěbne stejišća Domowiny k naćiskam prawniskich předpisow a k aktualnym prašenjam,
b) stejišća Domowiny k předewzaćam regionalneho planowanja,
c) delegowanje kulturnych skupin w nadawku Domowiny, projekty kulturneje wuměny a słužbne jězby do wukraja,
d) koncepty za róčnicy a jubileje,
e) naprawy w zwisku z wobhospodarjenjom imobilijow Domowiny,
f) nadawki k prawniskej poradźe Domowiny,
g) kónčna redakcija za stejišća, rezolucije, memorandumy a podobne wozjewjenja Domowiny, kiž so w zjawnosći rozšěrjeja (brošurki, stejišća, rezolucije, memorandumy a podobne).
h) wobdźělenje Domowiny na projektach druhich nošerjow,
3. Zwjazkowe předsydstwo informuje so na kóždym posedźenju wo dźěławosći a rozsudach prezidija a dóstanje přehlad wobzamknjenjow.
4. Posedźenja prezidija su zasadnje njezjawne. Čłonojo zwjazkoweho
předsydstwa smědźa so na posedźenjach wobdźěleć.
§ 11
Winowatosće čłonow zwjazkoweho předsydstwa
1. Nimo aktiwneho wobdźělenja na posedźenjach zwjazkoweho předsydstwa ma čłon/čłonka zwjazkoweho předsydstwa wosebite winowatosće napřećo župje resp. towarstwu, kotraž/kotrež je jeho za wólby do zwjazkoweho předsydstwa nominowała/o. Wón/wona ma předsydstwo župy resp. towarstwa prawidłownje wo jeho skutkowanju informować, předłohi w předpolu posedźenjow z nimi diskutować, wobzamknjenja zwjazkoweho předsydstwa rozkłasć a jich přesadźenjé podpěrować.
2. Wobzamknjenja su za kóždeho čłona zwjazkoweho předsydstwa jenak zwjazowace. Žadyn čłon zwjazkoweho předsydstwa nima po wotumje wjetšiny gremija prawo, přesadźenje wobzamknjenjow blokować a swójske a napřećiwne aktiwity přewjesć.
3. Hdyž zwjazkowe předsydstwo postaji, zo njesmě so wo wěstych prašenjach zjawnje informować, ma kóždy čłon gremija winowatosć k mjelčenju. Tuta winowatosć wobsteji hač do wuwjazanja na zakładźe rozsuda zwjazkoweho předsydstwa.
Winowatosć k mjelčenju pak płaći bjez wobmjezowanja za škitane personalne daty.
§ 12
Zjawnostne dźěło
1. Zjawnosć a žurnalisća přeprošuja so z nowinskim wozjewjenjom na zjawne wuradźowanja zwjazkoweho předsydstwa. Dnjowy porjad so zdobom w interneće wozjewi.
Zajimowanym žurnalistam móža so předłohi jako kopija k dispoziciji stajić, jeli njejsu dowěrliweho razu.
2. Wobzamknjenja posedźenjow zwjazkoweho předsydstwa měli so w běhu jednoho tydźenja na internetnych stronach Domowiny wozjewić.
Po posedźenju zhotowi nowinska rěčnica k informaciji zjawnosće medijowe wozjewjenje wo hłownych ćežišćach a wuslědkach zeńdźenja.
3. Rozsudy interneho resp. dowěrliweho razu, kotrež njesmědźa so wozjewić, so na posedźenju konkretnje pomjenuja.
4. Kóždy čłon zwjazkoweho předsydstwa je k aktiwnemu zjawnostnemu dźěłu namołwjeny.
Změnjeny jednanski porjad schwali so na posedźenju zwjazkoweho předsydstwa dnja 18. junija 2011 we Łazu a nabudźe z tym swoju płaćiwosć.