Budyšin/Bautzen, dnja 01.07.2008

Nowy sobudźěłaćer w zarjedźe Domowiny

Dźensa nastupi 24-lětny Wotrowčan Clemens Škoda swoje dźěło jako regionalny rěčnik Domowiny za teritorij Župy „Michał Hórnik“ Kamjenc. Po powołanskim wukubłanju je wón informatikar a jako tajki dlěje hač lěto jako koordinator za předźěłanje datow w Krajnym statistiskim zarjedźe w Kamjencu dźěłał. Tuchwilu zakónči młody muž swój studij kultury a managementa na Fachowej wysokej šuli Žitawa/Zhorjelc. W Domowinskim dźěle so hižo wjele lět angažuje, je spiritus rector Wotrowskeje młodźiny. Wobdźělnikam hłowneju zhromadźiznow Domowiny w Budyšinje a w Kulowje je přez diskusijnej přinoškaj znaty. We wobłuku Swobodneho serbskeho wolerskeho zjednoćenstwa kandidowaše při zašłych komunalnych wólbach. „Wjeselu so, zo móžachmy tute městno z Clemensom wobsadźić, a mamy wysoke wočakowanja na njeho“, praji dźensa w Budyšinje předsyda Domowiny Jan Nuk. Dźěłowe zrěčenje je wobmjezowane, wone płaći hač do kónca přichodneho lěta.

B. Felberowa