Budyšin/Bautzen, dnja 01.07.2008

Diskusija wustawkow zahajena

Wčera wuradźowaše w Budyšinje prezidj Domowiny ze županami a předsydami nadregionalnych towarstwow kaž tež z čłonami wustawkoweho wuběrka. Zaměr bě, tak předsyda Domowiny Jan Nuk na spočatku, so we wólnej rozmołwje w předpolu hłowneje zhromadźizny a 100. róčnicy załoženja Domowiny wo tym dorozumić, hdźe su njedostatki w jeje dźěle, kotre korektury su trěbne a kak hodźa so wone zeskutkownić. Kaž žiwa, zdźěla jara emocionalnje wjedźena diskusija pokaza, přitomni tutu składnosć intensiwnje wužichu.

Na dnjowym porjedźe stejachu tři wobsahowe ćežišća: Sprěnja: Domowina je po sebjezrozumjenju zastupnica zajimow Serbow. Kak so tute sebjezrozumjenje dźensa w praksy wuskutkuje? Zdruha: Kotru rólu zaběra Domowina w dźensnišej towaršnosći a kotre formy sobu- abo samopostajowanja wona ma. Třeći dypk bě program Domowiny a strategiske wusměrjenje dźěławosće třěšneho zwjazka w přihotach na 100. róčnicu jeje załoženja. We wotewrjenej atmosferje jewješe so wjele kritiki, ale tež nowe ideje so zrodźichu. Tak so zwěsći, zo so woleni zastupjerjo někotrych towarstwow - njehladajo na listy a rozmołwy - měsacy dołho na posedźenjach zwjazkoweho předsydstwa njewobdźělichu. To pak je prěnje wuměnjenje za mjezsobnu informaciju a zhromadne dźěło tutoho woleneho gremija, kiž ma po wustawkach mjez hłownymaj zhromadźiznomaj dźěło Domowiny nawjedować, z čłonskimi towarstwami. Na druhim boku pominaše so wuše zhromadne dźěło zwjazkoweho předsydstwa a zarjada ze skupinami. Wustawkowy wuběrk budźe namjety z diskusije zezběrać a pokiwy za polěpšenje dźěławosće Domowiny zdźěłać.