Čěscy „Lužičanjo“ witachu Serbski wjesny ansambl Wudwor

Kónc tydźenja je so přewjedł Sewjeročěski folklorny festiwal Tolštejnske panství

Jan Kuča

Krasna Lipa. Kónc tydźenja přewjedźe so w Krasnej Lipje štwórty „Mjezynarodny folklorny festiwal Tolštejnského panství“, na kotryž je domjacy ansambl „Lužičan“ přeprosył. Z wosebitymi słowami zarjadowarja witaše so tohodla tež ansambl z Łužicy a to „Serbski wjesny ansambl Wudwor“. Šěsć porow młodych ludźi w spodobnej katolskej narodnej drasće předstaji wotměnjace serbske reje. A spěwarska skupina mužow „Přezpólni“ program z małoznatymi spěwami ze Smolerjoweje zběrki wobohaći. Kedźbnosć wubudźi nawoda spěwarjow Fabijan Kaulfürst, jako publikum z postrowom z bliskeje Łužicy čěsce wupraji. Přiklesk je pokazał, zo je so serbska folklora tež wobydlerjam a hosćam čěskeho sewjera lubiła.

Sobotniši program zahaji na jewišću krasnolipskeho torhošća ansambl „Rusawy“ ze sewjerowuchodneje Morawy, z kotrymž domjacy „Lužičan“ hižo dołholětne kontakty wudźeržuje a „Wudworčenjo“ nawjazachu tam prěnje rozmołwy zhromadneho dźěła. Z programom wožiwi krasnolipske torhošćo, w na 70 budkach poskićachu so wosebje ludowuměłske ručne twory za region typiske, rězbarstwa, wušiwanki a dalše, tak zo so stwori prawy hermank ludoweho rjemesła.

Folklorne popołdnjo započny so z přechodom wšitkich wobdźělenych ansamblow přez město a kóžde ćeleso prezentowaše so z krótkim předstajenjom před połnje wobsadźenym torhošćom. Swoje wuměłstwo předstajichu – nimo „Wudworčanow“ – ansambl „Trnafčan“ ze słowakskeje Trnavy, „Úsměv“ z Horní Břízy w zapadnych Čěchach, „Lipka“ z wuchodočěskich Pardubic, „Vonica“ ze Zlína na wuchodnjej Morawje, dźećace ansambl „Jizerka“ z Liberca w sewjernych Čěchach a walaske spěwy a reje pokaza „Rusava“ z Bystřice pod Hostýnem na sewjerowuchodnej Morawje. Festiwal so wječor w městnym kulturnym domje z programom „Cos porobil, Pavelenko, Pavle“ (Što sy činił, Pawlko, Pawlo, spočatk popularneho morawskeho spěwa) stej wuhotowałej „Lužičan“ a „Rusava“ a publikum je hač do nocy sobu spěwał a rejował.

Na folklorny festiwal staj z Prahi tež předsyda Folklorneho zwjazka Čěskeje republiki Zdeněk Pšenica, zamołwita za wukraj Jarmila Zorbićowa přijěłoj, kotrajž je direktor festiwala Tolštejnského panství Petr Semelka wutrobnje přiwitał. Z hosćom běše tež Jurij Łušćanski, Domowinski referent za kulturne naležnosće a wukraj. Po boku festiwala so woni na rozmołwu zetkachu, na kotrejž so tež čłon zwjazka Jan Kuča, ludowědnik a dobry znajer serbskeje kultury a rěče wobdźěli. Hosćićel a hosćo so wzajomnje wo dźěłałosći swojich organizacijow informowachu a wo móžnosćach konkretneho zhromadneho dźěła wosebje nahraničnych projektach rěčachu. Folklorny zwjazk ČR (1990 załoženy) zastupuje zajimy ludowych spěwarjow, rejowarjow a hudźbnikow po cyłej republice, zwjazkej přisłuša něhdźe 14000 čłonow w 412 ansamblach, kotřiž přisłušeja 17 regionalnym zwjazkam. Lětnje wuhotuja resp. koordinuja so wot zjwazka wyše 50 mjezynarodne folklorne festiwale w tu- a wukraju.

Předsyda Folklorneho zwjazka ČR je serbsku delegaciju Domowiny k dalšemu jednanju lětsa nazymu do Prahi přeprosył a Łušćanski delegaciju z Prahi na mjezynarodny folklorny festiwal „Łužica“ klětu do Chrósćic. Direktor festiwala Petr Semelka přeje sej, zo by so na kóždym festiwalu w Krásnej Lípje, kotryž so kóžde lěto wotměwa, tež serbski ansambl wobdźělił. „Najbliši puć k nam maja Łužiscy Serbja, potjakim so woni naši najbliši susodźa a tohodla měli naši ludźo wašu kulturu dožiwić, a so z wašim ludom lěpje zeznać. Z „Wudworčanami“ je so lětsa činił dobry započatk a nadźijam so, zo móžu přichodne lěto zaso ansambl z Łužicy powitać.“