Kolokwij „Serbska kultura“ so za kónc nowembra 2008 přihotuje

Budyšin. 13. hłowna zhromadźizna Domowiny je dnja 31.měrca 2007 přewjedźenje kulturneje konferency lěta 2008 wobzamknyła. Wuběrk za kulturne naležnosće, wuměłstwo, wědomosć a sport je dóstał nadawk konferencu přihotować. Čłonojo wuběrka wospjet wo přewjedźenju kulturneje konferency wuradźowachu, prašejo so, hač hodźi so narokej wobšěrneje konferency wotpowědować. Do přihotow konferency by słušała wědomostna analyza dźensnišeho stawa serbskeje (ludoweje) kultury. Analyzu by měł Serbski institut přewjesć a tohodla wjedźechu so – zańdźene lěto hižo – rozmołwy z direktorom prof. D. Šołtu a wotrjadnicu dr. E. Černekožewu. Zwólniwosć k přewjedźenju tajkeje analyzy je so wuprajiła. Mjez tym pak dźěłaše Institut za kulturnu infrastrukturu Sakskeje w nadawku załožboweje rady na kulturno-politisko-wědomostnej analyzy Serbskeho ludoweho ansambla. Dźěło je zakónčene a samsny institut dósta mjez tym dalši nadawk (7.5.2008 w Chośebuzu), a to zdźěłanje wobšěrneho posudka, kiž ma wobsahować ewaluaciju dotalneho dźěła a konsolidaciski koncept za dalše spěchowanje serbskeje rěče a kultury. Hotowy posudk ma předležeć kónc meje přichodneho lěta. To rěka za přewjedźenje kulturneje konferency Domowiny, zo so wuslědki h. mj. posudka njehodźa za konferencu wužiwać. A zdruha, jónu wotmysleny nadawk za serbski institut so njewupraji, dokelž so dwoje analyzy njespěchujetej.

Po wopisanej situaciji njehodźi so narokej kulturneje konferency wotpowědować a tohodla rozsudźi wuběrk přewjesć nic konferencu, ale kolokwiji „Serbska kultura na spočatku 21. lětstotka“. Zarjad Domowiny je z pomocu wuběrka a Serbskeho instituta zdźěłał naprašnik, z kotrymž ma so „zwěsćić dźensniši staw serbskeje ludoweje kultury, wopisać aktualne ramikowe wuměnjenja a perspektiwy.“ Dnja 3. apryla so kulturnym lajskim skupinam, chóram, folklornym a šulskim ansamblam, dźiwadłowym a spěwnym, drastwowym a domiziskim skupinam Hornjeje a Delnjeje Łužicy připósłachu naprašniki. Zwěsćić ma so dźensniši staw lajskeje kultury. Prašamy so mj. dr. za starobnej zestawu lajskeho wuměłskeho cyłka, za rěčnej situaciju, hač so mjezsobu serbsce rěči a kak daloko je program serbski, kotre konkretne podpěry, pomocy woni do přichoda trjebaja a kajke su přeća.

Wo wotběhu, wobsahu a terminje kolokwija “serbska kultura” rozsudźi doskónčnje wuběrk. Na kóždy pad budźe to kónc tydźenja 21. abo 22. nowembra lětsa.

J. Łušćanski