Plan jako PDF Budyšin/Bautzen, dnja 04.06.2008
11. wopomnjenski dźeń za wotbagrowane serbske wsy
Sobotu, dnja 14. junija 2008 w 14.00 hodź. přewjedźe so 11. raz wopomnjenski dźeń Domowiny za wotbagrowane serbske wsy. Lětuši wopomnjenski dźeń wěnuje so něhdyšej serbskej wsy w tehdy hłubokej holi – Gozdźej pola Grodka, kotryž so před 40 lětami wudobywanja brunicy dla zhubi. Zarjadowanje wotměje so na rekultiwěrowanej płoninje wotkryteje jamy Wjelcej-juh při puću podłu jamy mjez sydłom zarjada jamy – Tagesanlagen Welzow Süd – a Prožymom / Proschim.
Předsyda Domowina Jan Nuk a předsydka Domizniskeho towarstwa Gózdź Brigitte Kröger budźetej w swojimaj narěčomaj na něhdyšu serbsku wjes a dóńt jeje wobdylerjow spominać. Po postrownych słowach prof. dr. Detleva Dähnerta (Vattenfall) a měsćanosty Grodka, Dr. Klaus-Peter Schulze, wotkrytej so wopomnjenski kamjeń a wopomnjenska tafla, kotraž němsce a serbsce wo stawiznach wsy informuje. Nimo toho chcedźa ze sadźenjom lipy na serbske korjenje wsy dopominać. Grodkowscy muzikanća wopomnjensku swjatočnosć kulturnje wobrubja.
Domizniske towarstwo Gózdź je wudało brošuru wo něhdyšej ródnjej wsy, kotruž móžeja sej zajimcy na městnje kupić.
Předsyda Domowiny a předsydka domizniskeho towarstwa přeprošujetaj zajimcow cyle wutrobnje.
Dalše informacije:
Werner Sroka, referent Domowiny, tel.: 03591/550104 a
Brigitte Kröger, předsydka Domizniskeho towarstwa Gózdź, tel. 03563/93951 abo 0171/5517229