Budyšin/Bautzen, dnja 16.05.2008

Wobdźělće so – tež Wy sće potrjecheni!

Wčera popołdnju wuradźowaše w Budyšinje znowa iniciatiwna skupina, kiž
přihotuje demonstraciju Serbow a přećelow Serbow dnja 29. meje w
Berlinje. „Tež hdyž steji zběhnjenje zawěry dźěla pjenjez Zwjazka za
załožbu za serbski lud k diskusiji, tak wona tola njeje hišće
rozsudźena. Njeměli tuž žanym iluzijam podlěžeć“, wuzběhny čłonka
iniciatiwneje skupiny dr. Susanne Hozyna. Nimo wot Serbow za lěto 2008
požadaneje sumy 16,4 millionow € ma so w financnym zrěčenju mjez
Zwjazkom, Sakskej a Braniborskej, kiž ma dołhodobnje etat załožby
zaručić, inflaciska rata dodać, zo bychu serbske projekty a institucije
tež w přichodźe wobstać móhli. Wotzamknjenje noweho zrěčenja njeje
tuchwilu wotwidźeć, njeznata je tež wysokosć spěchowanja, kiž ma so tam
zapisać. Dźe wo sorabistiske slědźenje, wo wudawanje serbskeho ćišćaneho
słowa, wo lajske a profesionelne serbske wuměłstwo, haj – wo wšě pola
serbskeho narodneho žiwjenja.

Tohodla wobroća so čłonojo iniciatiwneje skupiny zawodowych a
personalnych radow z podpěru Domowiny znowa na wšón serbski lud z
wutrobnej próstwu a namołwu, přihoty a přewjedźenje demonstracije w
Berlinje po swojich mocach podpěrać. Čas přizjewjenjow je so w Hornjej a
srjedźnej Łužicy na 22. meje podlěšił. Přizjewjenja přijimuja so pod
e-mailowej adresu petrowa-stiftung@sorben.com, pola Serbskeje kulturneje
informacije w Budyšinje (Serbski dom, tel. 03591 550-111), w regionalnym
běrowje Domowiny w Slepom (Serbski kulturny centrum, Tel. 035773 76153)
kaž tež pola LODKi w Choćebuzu (Serbski dom, tel. 0355 48576-468). Jězba
z busom płaći na wosobu 10 €; za dźěći pod 12 lětami je wona darmotna.
Dokelž nastanu na přikład za milinu kóšty, je so załožiło darjenske
konto za demonstraciju dnja 29. meje 2008 w Berlinje:
Mějićel konta / Kontoinhaber: Domowina z.t. / Domowina e.V.
banka / Bank: Němska banka / Deutsche Bank
BLZ 870 700 00
čisło / Kontonummer: 6123 269 01
zaměr / Verwendungszweck: demo Berlin

Namołwu, krótkoportret serbskich zarjadnišćow (hornjoserbsce,
delnjoserbsce a němsce) kaž tež formular za próstwu wo wuswobodźenje
dźěći z někotrych hodźin šulskeje wučby na tutym dnju namakaće tež na
internetnej stronje Domowiny pod http://www.domowina.de .