Budyšin/Bautzen, dnja 06.05.2008

Namołwa k demonstraciji w Berlinje

„Naš protest, kiž smy dnja 17. měrca po hasach Budyšina demonstrujo zwuraznili, njejsu zamołwići prawdźepodobnje słyšeli. Tohodla wospjetujemy swoje žadanja a pojědźemy do Berlina.“ To je wuslědk wčerawšeho wuradźowanja iniciatiwneje skupiny zawodowych a personalnych radow serbskich institucijow Serbski institut, Němsko-Serbske ludowe dźiwadło, Serbski ludowy ansambl, Ludowe nakładnistwo Domowina, Rěčny centrum WITAJ a Załožba za serbski lud, kiž so wot Domowiny podpěruje. Wona wobzamkny, dnja 29. meje w centrumje Berlina demonstraciju přewjesć. Wšitcy wobdźělnicy zetkaja so na tutym dnju w 15.45 w Berlinje na naměsće Bebela/Pod lipami (Bebelplatz/Unter den Linden).

Wšitcy Serbja a přećeljo Serbow, wšitcy čłonojo serbskich towarstwow a přistajeni serbskich institucijow su namołwjeni, so na zhromadnej manifestaciji wobdźělić. „Žadamy sej wotzamknjenje dołhodobneho financneho zrěčenja mjez Zwjazkom, Braniborskej a Sakskej, kotrež projektowe a institucionelne spěchowanje serbskeje rěče a kultury w dosahacej wysokosći garantuje a stupace kóšty wobkedźbuje“, rěka w dźensa wozjewjenej namołwje.

Za jězbu do Berlina organizuja so busy; prěni startuje dnja 29. meje w 11.30 hodź. w Budyšinje, dalše městna so hišće wozjewja. Jězba z busom płaći na wosobu 10 €. Přizjewjenja přijimuja so hač do 15. meje pod e-mailowej adresupetrowa-stiftung@sorben.com , pola Serbskeje kulturneje informacije w Budyšinje (Serbski dom, tel. 03591 550-111), pola LODKi w Choćebuzu (Serbski dom, tel. 0355 48576-468) kaž tež w regionalnym běrowje Domowiny w Slepom (Serbski kulturny centrum, Tel. 035773 76153).

Namołwa k demonstraciji w Barlinje (delnjoserbsce)
tu jako PDF

Namołwa k demonstraciji w Berlinje (hornjoserbsce)
tu jako PDF

Aufruf zur Demonstration in Berlin (deutsch)
hier als PDF