Budyšin/Bautzen, dnja 10.04.2008

Z posedźenja zwjazkoweho předsydstwa

Financna situacija Załožby za serbski lud bě centralna tema wuradźowanja Zwjazkoweho předsydstwa Domowiny wčera wječor w Kulowje. Po informaciji wo wuslědkach zašłeho posedźenja załožboweje rady zwjazkowe předsydstwo wobzamkny:

„Zwjazkowe předsydstwo wobkrući swoje wobzamknjenje čo. 130 z dnja 12. měrca 2008. Wone wočakuje wot serbskich čłonow załožboweje rady, zo so na planowanym wuradźowanju załožboweje rady dnja 7. meje w Choćebuzu njewobdźěla – chiba zo ramikowe wuměnjenja za nowe financne zrěčenje wotpowěduja žadanjam, kotrež su w memorandumje za zachowanje serbskeho luda zapisane. Zwjazkowe předsydstwo namołwja wšěch Serbow organizować protestne akcije přećiwo planowanym skrótšenjam spěchowanskich srědkow za Załožbu za serbski lud a so na tajkich wobdźělić.“

Dale přiwza zwjazkowe předsydstwo Towaršnosć za spěchowanje SLA z.t. nachwilnje jako rjadnu čłonku Domowiny. Zdobom wone 14. hłownej zhromadźiznje doporuči, jeje přistup doskónčnje schwalić. 14. hłowna (wólbna) zhromadźizna wotměje so dnja 28. měrca 2009 w Chrósćicach. Zwjazkowe předsydstwo wobzamkny wčera kluč delegatow - jich budźe cyłkownje 244 ze 18 župow a towarstwow - a powoła wustawkowy wuběrk. Jemu přisłušeja Horst Adam, Joachim Glücklich, Manfred Hermaš, Jan Nuk, dr. Měrćin Wałda a Beno Paška.

Čłon zwjazkoweho předsydstwa a župan župy Budyšin Měrćin Škoda předstaji naćisk k wustawkam wo spěchowanju serbskeje rěče a kultury noweho wulkowokrjesa Budyšin, kiž su třo županojo a regionalni rěčnicy wudźěłali. Naćisk budźe so krajnym radam a radźićelam tuchwilneju wokrjesow Budyšin a Kamjenc kaž tež wyšimaj měsćanostomaj Budyšinja a Wojerec posrědkować. Zwjazkowe předsydstwo schwali wočakowanja Domowiny na kandidatow k wokrjesnym wólbam w Sakskej dnja 8. junija ( Tu jako pdf ).