Slepo 08.04.2008

Slepjanski festiwal dudakow njebudźe

Wulkozarjadowanje, kotrež je Marketingowa towaršnosć Hornja Łužica-Delnja Šleska hižo loni we wobłuku akcije „Kulturne dožiwjenje Hornja Łužica 2008“ na wikach a turistiskich prezentacijach připowědźiła, so njewotměje.

Přičina su skrótšenja a wobmjezowanja w etaće Załožby za serbski lud na lěto 2008. Dla skrótšenja wo 800.000 € a z tym cyłkownje nišeje sumy we wysokosći 15,6 milionow €, zamróženja 2,6 milionow € ze stron Zwjazka a 600.000€ ze stron Braniborskeje hač do wotzamknjenja noweho financowanskeho zrěčenja njejsu sobudźěłaćerjo załožby kmani jednać. Sakska pak swój podźěl w dospołnej wysokosći 5,45 milionow € a tež bjez wobmjezowanja, kaž hižo 2007, k dispoziciji staji.

Tutón etat bu njedawno bjez šesćoch serbskich zastupjerjow w załožbowej radźe schwaleny.

VI. festiwal dudakow chcyše wot 24. – 26.10.2008 z tu- a wukrajnymi folkornymi skupinami hosćom we wobłuku Slepjanskeje kermuše dohlad do tradicionalneje serbskeje dudakoweje hudźby poskićić. Zdobom mějachu so dudakojo z Pólskeje, Čěskeje a Němskeje wzajomnje z hudźbu a wosebitosćemi dudow w tutych třoch krajach zeznajomić. Štyri ansamble ze Slepoho chcychu festiwal składnostnje swojeho lětušeho jubileja ze swojimi programami wobohaćić.

Hižo trójce su organizatorojo tutoho swjedźenja wuradźowali, dźěłowe skupiny wutworili, wotběh programa planowali, poskitki oranizowali, financy planowali, přenocowanja rezerwowali.

Njehladajo zhromadneho financowanja wjacorych partnerow dybjachu tući na swojim wčerawšim wuradźowanju njedosahacych srědkow ze stron Załožby za serbski lud dla wozjewić, zo so naročne předewzaće njezwoprawdźi.

Dojednachu so na přewjedźenje kermušneje njedźele (26.10.2008) z kermušnej Božej słužbu, burskimi a rjemjeslniskimi wikami kaž tež na jubilejne programy štyrjoch tudyšich hudźbnych a folklornych towarstwow.

Wolfgang Kotissek – sobudźěłaćer Towarstwa za serbski kulturny turizm