Budyšin, dnja 29.03.2008

Maćica Serbska z nowym předsydstwom

Sobotu, dnja 29. měrca, wotmě so w Budyšinje hłowna wólbna zhromadźizna Maćicy Serbskeje. Serbski superintendent Jan Malink z Budyšina bu jednohłósnje jako předsyda wuzwoleny. W swojich zakónčacych słowach pokaza wón na wjace hač 150-lětne stawizny Maćicy Serbskeje jako wědomostne towarstwo; wone měło tež w přichodźe w zhromadnosći na dobro serbskeho luda skutkować a wědu za Serbow a wo Serbach šěrić. Nowemu předsydstwu přisłušeja Jěwa-Marja Čornakec, Marko Kowar, Jurij Łušćanski, Janka Pečkojc de Lévano, dr. Christiana Piniekowa, dr. Anja Pohončowa, Měrko Šołta a dr. Pětš Šurman.

Z nekorologami spominachu Maćicarjo na swojich zemrětych čłonow, na předsydu dr. Měrćina Völkela, na hudźneho wědomostnika a komponista dr. Jana Rawpa a na kulturnika Delneje Łužicy Maksa Šurmana.

Referataj měještaj dr. Franc Šěn wo wuznamje a dóńće Hórnikoweje knihownje w Praze a Trudla Malinkowa wo fararju Gustawje Mjerwje, kotryž je w Bukečanskej wosadźe spomóžnje skutkował.

Wulki angažement Měta Pernaka z Berlina, kiž bě 13 lět jako předsyda delnoserbskeho wotdźěla Maśica Serbska skutkował, připózna so z jeho přiwzaćom jako čestny čłon Maćicy Serbskeje. Dr. Pětš Šurman rysowaše w swojej lawdaciji šěroke skutkowanje Měta Pernaka, kotryž słuša k najlěpšim znajerjam delnjoserbšćiny, tež jako literat a přełožowar.

Za nazymu tutoho lěta přihotuje so kolokwij na česć prof. Pawoła Neda, kotryž Maćica Serbska, Serbski institut a Domowina zhromadnje organizuja.

Maćica Serbska ma 117 čłonow, z nich je 27 z wukraja. Delnjoserbski wotdźěl Maśica Serbska ma 22 čłonow; nimale wšě serbske institucije w Delnjej Łužicy su w nim zastupjene.