Budyšin/Bautzen, dnja 26.03.2008

Prezidij podpěra stejišćo župy Wojerecy

Zakładna šula „Handrij Zejler“ měła na dotalnym městnje wostać

Jednaćel Domowiny Bjarnat Cyž je so nětko z listom na wyšeho měšćanostu Wojerec, Stefana Skoru, wobroćił. W nim informuje wo tym, zo prezidij Domowiny stejišćo župy Wojerecy podpěruje, zo měła Zakładna šula „Handrij Zejler“ we Wojerecach na dotalnym městnje Při worjole wostać. Wona je, tak rěka w poziciskej papjerje, kotruž staj předsyda Domowiny Jan Nuk a nawoda RCW Rafael Wowčer podpisałoj, „ jenička zakładna šula we Wojerecach, kotraž nawjazujo na WITAJ-projekt w pěstowarnjach dwurěčne kubłanje po wupruwowanej koncepciji 2plus poskićuje … Cyłkowny koncept Zejlerjoweje šule za dwurěčne kubłanje je so spomožnje wuwił. Njesmě so přeměstnjenja dla do prašenja stajeć. Njehodźi so zamołwić, zo starši dla přeměstnjenja šule swoje dźěći na druhe kubłanišća sćelu.“

Wyšeho měšćanostu proša, zo by stejišćo prezidija Domowiny zamołwitym zarjadnistwa a měšćanskim radam k informaciji a wobkedźbowanju přepodał. „Nadźijamy so, zo so wotpohlad k přepołoženju šule na zakładźe wuslědkow wobydlerskeho požadanja cofnje“, pisa jednaćel.

Tekst stejišća prezidija Domowiny namakaće tu jako pdf-dataju.