Budyšin/Bautzen, dnja 13.03.2008

Z posedźenja Zwjazkoweho předsydstwa Domowiny

Zwjazkowe předsydstwo Domowiny – Zwjazka Łužiskich Serbow z.t. zaběraše so na swojim wčerawšim posedźenju w Budyšinje mjez druhim z aktualnej financnej situaciju Załožby za serbski lud. K tomu slědowace wobzamkny:

„Zwjazkowe předsydstwo Domowiny – Zwjazka Łužiskich Serbow z.t. žada sej wot pjenjezydawarjow Załožby za serbski lud, zo so přiražki w trěbnej měrje, kaž su w ‘Memorandumje k dalšej eksistency serbskeho luda w Zwjazkowej republice Němska' jako najniša hranica přiražkow za nowe financne zrěčenje zapisane, k dispoziciji staja.

Za lěto 2008 so w memorandumje žada minimalna suma we wysokosći 16,4 mio. Euro a za naslědne lěta přiměrjenje k wuwiću kóštow. Podkročenje žadaneje najnišeje hranicy přiražkow wjedźe njewotwobrotnje k zawrjenju za zachowanje serbskeje rěče a kultury njeparujomnych unikatnych serbskich institucijow. Za tutón pad wočakuje Zwjazkowe předsydstwo Domowiny wot serbskich čłonow Rady Załožby za serbski lud, zo so na wobzamknjenjach k rozpušćenju serbskich institucijow njewobdźěla a namołwja jich, sobuskutkowanje w Załožbowej radźe wusadźić.”